Vrystaat Sandveld tak: Lug- en randslaggeweer pretskiet

Die Vrystaat Sandveld-tak by Soutpan tussen Bultfontein en Bloemfontein in die Vrystaat bied ŉ baie gewilde pretskietgeleentheid met lug- en randslaggewere aan vir alle ouderdomsgroepe. Een van die eienskappe van die pretskiet is dat dit nie op papierteikens geskiet word nie. Die fokus is op ŉ wye verskeidenheid reaktiewe teikens. Ongeveer 130 skuts het die 22 kaliber skietdag in 2019 bygewoon – merkwaardig vir hierdie plattelandse tak met ongeveer 300 lede.

Ster met kleiduif kleiteikens: wanneer die eerste klei stukkend geskiet word, begin die ster heen en weer swaai en moet die skut die res van die kleie skiet terwyl dit beweeg.

Flipping Jack-teiken: Hierdie teiken val om wanneer dit getref word, maar daar is altyd ŉ volgende teiken (ronde plaatjie) beskikbaar. Dit is ŉ opwindende oefening waar twee of meer persone gelyktydig elkeen op sy/haar eie teiken skiet en kyk wie dit eerste 5m ver kan laat skuif.

Diereteikens gesny uit *conveyor belt*: wanneer ŉ koeël die ronde staalplaat tref, aktiveer dit ŉ sneller en val die teiken om.

Steek die vlaggie op: Die mikpunt is die wit pvc-pypie. Breek dit met ŉ groepering van ŉ paar skote teen tyd en dit aktiveer die geel vlaggie.

Gholfballe: vryhand staan – skuts kyk hoe ver hulle die gholfbal kan dryf met 5 skote. Dit verskaf baie pret wanneer twee of meer persone gelyktydig elkeen na sy/haar eie gholfbal skiet om te kyk wie se gholfbal trek die verste .

300mm plastiek Coke botteltjies: gooi ŉ teelepel of twee meel in ŉ droё botteltjie, pomp styf op en hang aan ŉ toutjie. Wanneer dit raakgeskiet word, klap dit soos ŉ geweerskoot en die meel veroorsaak ŉ wit stofbal.

Ballonne met meel in is ook ŉ prettige reaktiewe teiken.

Op so ŉ skietdag loop die spanning hoog en daar word met smaak vertel hoe ervare skuts sukkel om ŉ 22 geweer se magasyn vinnig genoeg te laai om voort te gaan met ŉ man-vs-man oefening soos met die gholfballe of die Flipping Jack. Skuts moet vinnig skiet en raak skiet. Dit is hier waar magasyne soms onder groot druk herlaai word en patrone selfs op die grond beland. Beslis groot pret!