Deur André van der Merwe – Bestuurder Tak- en Skietsake
Die deelnemers het op Vrydag 19 Augustus 2022 op die Meerkatgat-skietbaan vir die jaarlikse Nasionale Intertak-spanskietkompetisie saamgetrek. Hierdie kompetisie het in die verlede uit 30 spanne van vyf skuts elk bestaan, dus ’n totaal van 150 skuts. Teen die einde van 2021 is daar egter op versoek van die deelnemers besluit om dit te verander na 50 spanne van vier skuts elk, dus altesaam 200 skuts. Die 200 skuts is vanjaar in vier aflossings ingedeel, waar daar in die verlede net drie aflossings geskiet is met 50 skuts per aflossing.
Die weersomstandighede was ’n groot uitdaging met die wind wat regdeur die dag gewissel het van ongeveer 10 tot 25 km/h en tot en met 10:00 was dit snerpend koud. Veral vroegoggend is die klubhuis benut deur diegene wat nie op die skietbaan moes wees nie en die koffie het groot aftrek gekry! Om tyd te bespaar het elke aflossing van 50 skuts op die 100 m-skietpunt aangetree en die inskiet van gewere is afgehandel. Daarna is die vlakteskietoefening in die omgekeerde volgorde afgehandel: Eers het die 100 m-skietoefening plaasgevind, gevolg deur die twee skietoefeninge op 200 m, en laastens die skietoefening op 300 m (vier oefeninge van drie skote elk – ’n totaal van 12 skote). Die volgende aflossing het dan aangetree vir hul inskietoefening en daarna die vlakteskietoefening in dieselfde volgorde. Ná voltooiing van die vlakteskietoefening deur al vier aflossings, is die bosveldskietoefening op tradisionele wyse geskiet deur met die 150 m-skietoefening af te skop, gevolg deur die 100 m-skietoefening en daarna die twee skietoefeninge op 50 m (vier skietoefeninge van drie skote elk – ’n totaal van 12 skote) wat die skietkompetisie van 24 skote voltooi het. Ondanks die weersomstandighede is baie goeie tellings behaal, maar daar was geen spanne wat vir die Nasionale Wildehondekleure gekwalifiseer het nie.
Baanoffisiere: Corne Swart van die Riemland-tak was die hoofbaanoffisier wat saam met sy span baanbeamptes die dag baie professioneel aangebied en alles seepglad laat verloop het. Corne, baie geluk en dankie aan jou en jou knap span wat die koue, winderige toestande getrotseer het om die kompetisie vir die skuts moontlik te maak. Ons is trots op julle!
Borgskap en prysuitdeling: Safari Outdoor het die dag geborg en was teenwoordig met ’n uitstalling, gazebo’s en baniere waarmee hulle die hele terrein versier het. SA Jagters dra graag hul hartlike dank oor aan Safari Outdoor vir hul besonderse ondersteuning van die skietkompetisie. Almal het dit geniet om weer ’n prysuitdeling by te woon ná die Covid-beperkings van die afgelope paar jaar.
Baie dankie ook aan die Vrystaat Sandveld-tak wat weer eens as gasheertak op die dag geskitter het met hul gasvryheid en al die reëlings en hierdie kompetisie baie suksesvol aangebied het!
Baie geluk aan die Swartwildebeestespan van Edelvalk wat as wenners uit die stryd getree het, Pretoria-Oos se Swartwitpense in die tweede plek en Genl De la Rey se A-span in die derde plek. Dit is merkwaardig dat daar dames en juniors in al drie hierdie topspanne is.
Top-10-plekke | ||
No | Span | Tak |
1 | Swartwildebeeste | Edelvalk |
2 | Swartwitpense | Pretoria-Oos |
3 | Genl De la Rey A | Genl De la Rey |
4 | Duiker Ramme | Duiker |
5 | Baviaanspoort Buffels | Baviaanspoort |
6 | Diamant Valke | Diamant |
7 | Diamant Blouklippies | Diamant |
8 | Riemland A | Riemland |
9 | Suikerbosrand Savanna | Savanna |
10 | Marico Bosveld Mambas | Marico Bosveld |
Wildehonde-toekenning: Die kwalifiserende standaard vir die Wildehonde is ’n minimum van 2 590 (90%) uit die totaal van 2 880 vir die span en ’n minimum van 1 225 (85%) uit die totaal van 1 440 vir elk van die skietoefeninge. Op streeksvlak het nege spanne gedurende 2021 vir die Wildehonde-toekenning gekwalifiseer, maar op nasionale vlak was daar geen kwalifiseerders nie.
