Geagte kollega
Die Polisie en Sentrale Vuurwapenregister het onlangs hulle prestasie (dit moet dalk eerder wanprestasie wees) aan die Parlementêre Portefeuljekomitee op Polisie gerapporteer. Na aanleiding van hierdie gebeure het die Registrateur van Vuurwapens ʼn skrywe gerig aan geakkrediteerde verenigings waarin verduidelik word waarom hulle sogenaamde prestasie dalk nie na wense is nie.
Hierdie nuusbrief handel uitsluitlik oor hierdie onderwerp.
Sentrale Vuurwapenregister
Met die rapportering van die prestasie van die Polisie en die Sentrale Vuurwapenregister het die volgende na vore gekom.
- Bevoegdheid
Daar is ʼn agterstand van 188 296 aansoeke om bevoegdheid wat wag om beoordeel en afgehandel te word. In die brief van brig. Mabule verduidelik hy dat die SVR vir elke aansoek om bevoegdheid die aansoeker se kriminele rekord moet nagaan wat deur die kriminele rekordsentrum verskaf moet word.
- Lisensie-aansoeke
Daar is ʼn agterstand van 138 908 aansoeke vir lisensies. Hierdie is nuwe aansoeke, nie hernuwings nie (hernuwings word op provinsiale vlak gedoen, nie deur die SVR nie). In sy brief verduidelik brig. Mabule dat daar probleme ervaar word met onvolledige aansoeke wat van die onderskeie stasies ontvang word en dat die SVR dan nie die aansoek kan prosesseer nie. Daar is verder ʼn verduideliking dat daar ʼn verpligting is op die aansoeker om toe te sien dat die plaaslike aangewese vuurwapenoffisier (AVO) wel die aansoek in die stelsel insleutel.
Dit is absoluut verregaande om die onus te plaas op die aansoeker om toe te sien dat sy inligting op die stelsel aangeteken word, wanneer dit duidelik die plaaslike AVO se werk is. Dit is die beampte se werk waarvoor hy/sy ʼn salaris ontvang.
- Amnestie-vuurwapens
In die 2019-amnestie is 29 758 vuurwapens ingehandig waarvoor weer aansoeke gedoen is vir lisensies. Hiervan is 14 899 aansoeke afgehandel en nog 14 858 aansoeke is uitstaande. So terloops, dit is nou al meer as 2 jaar nadat hierdie aansoeke ingehandig is.
In die amnestie van 2020/2021 is 75 363 vuurwapens ingehandig waarvoor daar weer aansoeke gedoen is vir lisensies. In hierdie geval is slegs 4 241 aansoeke afgehandel en is 71 122 steeds uitstaande.
Oor hierdie prestasie verduidelik brig. Mabule in sy brief dat daar vir elkeen van die vuurwapens eers ʼn ballistiese verslag bekom moet word voordat die Polisie die kan afhandel.
- Druk van lisensiekaarte
Wat lisensiekaarte betref, verduidelik brig. Mabule dat die SVR ʼn ooreenkoms het met die Staatsdrukker om lisensies te druk en per koerier te laat aflewer by die betrokke provinsiale kantoor.
Hy sê verder dat daar in verskeie gevalle spesiale reëlings getref word om die vlak van diens te verbeter. Een voorbeeld hiervan is dat Gauteng se lisensiekaartjies by die SVR afgelewer sal word en vandaar na die onderskeie Polisiestasies versprei sal word.
SA Jagters se ervaring oor die vlak van diens gelewer deur die SVR en die Polisie wat handel met vuurwapenlisensies is in die algemeen naastenby soos volg:
- Indien u enigsins in ʼn periode korter as 12 maande ʼn aansoek om bevoegdheid afgehandel kry is u buitengewoon gelukkig. Dit neem iewers tussen 12 en 18 maande om ʼn bevoegdheidsaansoek gefinaliseer te kry, soms selfs langer.
- Indien u enigsins in ʼn periode korter as 12 maande ʼn aansoek vir ʼn nuwe lisensie afgehandel kry, is u weer eens bevoorreg. Dit neem klaarblyklik ongeveer 12 maande om ʼn aansoek vir ʼn nuwe lisensie te kry. Die voorwaarde is natuurlik dat u bevoegdheid geldig moet wees.
- Indien u enigsins in ʼn periode korter as 6 tot 8 maande ʼn aansoek om hernuwing van ʼn lisensie afgehandel kry is u besonder gelukkig. Dit is maar die tyd wat dit neem om hierdie diens gelewer te kry. Die voorwaarde in hierdie geval is ook dat u bevoegdheid geldig moet wees.
Ons vind egter soms enkele gevalle waar ʼn aansoek in net drie tot vier weke afgehandel word. Dit wys dat dit moontlik is om teen so ʼn vlak diens te lewer as elkeen van die rolspelers net sy of haar werk doen.
ʼn Blinde hoender pik seker ook soms ʼn mieliepit raak.
Met inagneming van die gerapporteerde vlak van prestasie van die Polisie en die SVR in die hantering van lisensie-aansoeke en die bestuur van die Sentrale Vuurwapenregister behoort die Minister en die Bestuur van die Polisie lankal in die vuurlyn te wees.
Die briewe soos ontvang van brig. Mabule oor die redes waarom die SVR nie werklik verantwoordelik gehou kan word nie, watter ander afdelings in die Polisie ook betrokke is en welke spesiale reëlings daar getref word, is hieronder beskikbaar. Lees asseblief maar en oordeel vir uself.
Vriendelike groete
Fred Camphor
SA Jagters: HUB
| Filename | Size |
|---|---|
 Annexure A | 453.48 KB |
| Annexure B | 758.99 KB |
| Processing of Firearms Applocations Letter | 149.64 KB |
