FOTOGRAFIEKOMPETISIE INLIGTING EN REëLS
FOTOGRAFIEKOMPETISIE INLIGTING EN REëLS
Fotografie - Skiet met 'n verskil
Ons bied lede oud en jonk die geleentheid om hul fotografie te deel, hul vaardighede te verbeter en om mee te ding.
Fotografiekompetisie Inligting, Reëls, Bepalings en Voorwaardes
Menu
1. Algemene Inligting
SA Jagters se lede bestee graag tyd in die buitelug en baie lede is kranige fotograwe wat graag hulle foto’s met ander deel. SA Jagters se Fotografiekompetisie is veeldoelig:
- Dit skep ʼn platform waar lede hulle foto’s kan deel.
- Dit dien as aansporing om hulle vaardighede te verbeter.
- Dit gee erkenning aan fotograwe vir goeie foto’s.
- Dit verskaf ʼn goeie bron van foto’s om die vereniging se fotoportefeulje aan te vul.
Alle opbetaalde lede van die vereniging mag aan die Amateur Fotografiekompetisie deelneem.
Die kategorieë maak voorsiening vir foto’s met selfone en DSLR/spieëllose kameras
Lede wat hulle foto’s vir die SA Jagters Fotokompetisie inskryf, verleen outomaties toestemming aan SA Jagters om die foto’s op verskeie platforms te gebruik, met volle erkenning aan die fotograaf.
Ervare fotograwe beoordeel al die inskrywings vir elke tema volgens tegniese kwaliteit.
Die kompetisie duur jaarliks van 1 Januarie tot 31 Desember.
2. Toekennings
Elke kategorie en sy subkategorieë word volgens verskillende kriteria beoordeel. Die mees uitdagende en mededingende kategorie is “Fauna en Flora” vir volwassenes (18 jaar en ouer) wat DSLR- en spieëllose (ML) kameras gebruik.
Toekennings aan kwalifiserende inskrywings is soos volg:
- 60% tot 74%: Brons sertifikaat
- 75% tot 89%: Silwer sertifikaat
- 90% tot 99%: Goue sertifikaat
- uitstaande foto’s wat 100% behaal: Platinum
Die sertifikate word op lede se aanlyn profiel op die webwerf gelaai.
Lede wat toekennings ontvang, kan platinum, goud, silwer of brons fotobalkies, soortgelyk aan die skietbalkies, deur hulle takke bestel.
Fotograwe se inskrywings staan ook ’n kans om op die voorblad van die SA JAGTER tydskrif te verskyn, en sal ʼn spesiale toekenning vir hierdie prestasie ontvang.
Na afloop van die jaar se kompetisie, sal die Fotograaf van die Jaar en kategoriewenners bekend gemaak word. ʼn Kategoriewenner word slegs aangewys in kategorieë met tien of meer inskrywings.
3. Kategorieë
Die kategorieë vir die kompetisie sluit die tipiese omgewing of omstandighede in waarin lede hulle mag bevind wanneer hulle aan enige van SA Jagters se aktiwiteite deelneem.
Elke kategorie het drie ouderdomsgroepe:
- A – deelnemers 18 jaar en ouer
- B – deelnemers 18 jaar en jonger
- C – deelnemers 13 jaar en jonger
- (FF-DSLR) Fauna en Flora Digitale enkellens reflektief *(alles in die natuur eie aan Suider-Afrika)
- (FF-ML) Fauna en Flora Spieëlloos *(alles in die natuur eie aan Suider-Afrika)
- (FF-SMART) Fauna en Flora slimfoon/tablet *(alles in die natuur eie aan Suider-Afrika)
- (BUF) Buffels DSLR/spieëlloos/slimfoon/tablet *(ons soek altyd buffelfoto’s vir al ons projekte)
- (TAB) Takaktiwiteite en Bewaringsprojekte *(die doen en late van lede op takvlak en gedurende bewaringsprojekte)
- (SB) Die Skietbaan DSLR/spieëlloos/slimfoon/tablet *(gebeure op die skietbaan en gedurende kompetisies. Fotograwe moet deurgaans alle veiligheidsreëls op die skietbaan, rondom vuurwapens, en tydens jag handhaaf wanneer hulle foto’s neem.)
- (JV) Die Jagveld DSLR/spieëlloos/slimfoon/tablet *(mense en diere in die jagveld, gebeure tydens die jag, maar nie foto’s van diere wat gejag is nie. Stuur foto’s van diere wat gejag is aan Bokspog in SA Jagter/SA Hunter by bokspog@sahunter.org Fotograwe moet deurgaans alle veiligheidsreëls tydens die jag handhaaf wanneer hulle foto’s neem)
- (MS) Mentorskap DSLR/spieëlloos/slimfoon/tablet *(lees meer oor die SA Jagters Mentorskapprogram en stuur gerus foto’s wat hierdie aktiwiteit uitbeeld)
Lede mag elke maand ʼn totaal van 15 foto’s inskryf in verskillende kategorieë:
- maksimum van 5 foto’s in kategorie 1 of 2 (Fauna en Flora DSLR/ML en slimfoon)
- 5 foto’s vir kategorie 3 (Buffels)
- 5 foto’s in kategorie 4 of 5 of 6 of 7 (Takaktiwiteite en Bewaring, Die Skietbaan, Die Jagveld, Mentorskap).
4. Kompetisiereëls
- BAIE BELANGRIK: Foto’s moet 300dpi en groter as 2MB wees. Daar is geen beperking op die grootte van die foto nie.
- Alle metadata moet sigbaar wees.
- Slimfoonfoto’s moet op die skaal 3:4 geneem wees, geen volraamfoto’s word aanvaar nie.
- Slimfoonfoto’s moet sonder filters en spesiale effekte geneem wees.
- Foto’s moet geen watermerke, handtekeninge of ander erkenningsmerke bevat nie.
- Beide volkleur- en swart-en-wit foto’s word aanvaar maar aangesien volkleur vir meer doeleindes gebruik kan word, vra ons dat lede wat swart-en-wit foto’s inskryf ook die volkleur foto saamstuur vir die Vereniging se foto portefeulje.
- Foto’s mag tot ʼn mate verwerk word, maar geen komponente mag bygevoeg of verwyder word nie. Die beoordelaars behou die reg om foto’s te diskwalifiseer wat oormatig verwerk is.
- Dit is deelnemende lede se verantwoordelikheid om te verseker dat hulle die reëls van die kompetisie verstaan en nakom. Rig enige navrae aan info@sahunt.co.za
- Foto’s wat erkenning ontvang sal op die SA Jagters webwerf en in die SA Jagters-nuusbrief bekend gemaak word.
5. Hoe om in te skryf
- Die kompetisies is oop vir alle opbetaalde lede van SA Jagters maar is uitsluitlik vir amateurfotograwe (persone wat nie fotografie as ʼn beroep beoefen nie)
- Inskrywings is gratis.
- Vanaf 2024 is die proses om foto’s in te skryf baie vereenvoudig. Lede skryf eenmalig per e-pos in met een foto en al die nodige besonderhede. Daarna ontvang lede instruksies en ’n unieke skakel na ’n persoonlike OneDrive (cloud) lêer waarin hulle alle foto-inskrywings kan oplaai.
- Foto’s moet in hoë resolusie en groter as 2 MB wees. Daar is geen beperking op die maksimumgrootte van die foto’s nie.
- Stuur die e-pos na info@sahunt.co.za met die Fotokompetisie 2026 in die onderwerplyn.
- Al die onderstaande inligting moet die eerste en enigste inskrywing per e-pos vergesel:
- Naam en van:
- SA Jagters-lidnommer:
- Ouderdomsgroep:
- SA Jagters-tak:
- Selfoonnommer:
- E-posadres:
- Kategorie:
- Spesie of onderwerp:
- Plek:6
6. Bepalings en Voorwaardes
Slegs foto’s van fenotipiese fauna en flora in hul natuurlike habitat wat inheems is aan Afrika, en foto’s van verantwoordelike en volhoubare jag- en skietpraktyke word aanvaar.
Die volgende beskrywings van die reëls is van toepassing op die fotografiekompetisie:
- Afrika-inheems: spesies wat natuurlik in Afrika voorkom.
- Fenotipies: waarneembare natuurlike eienskappe volgens reël 3.1.5 van die algemene reëls van SA Jagters se trofeeregister. Dit beteken geen foto’s van kleurvariante of kruisings tussen spesies nie.
- Natuurlike habitat: Slegs foto’s van diere in ʼn natuurlike omgewing, m.a.w. nie foto’s van diere met oorplaatjies, tussen omheinings en by voerbakke nie.
- Verantwoordelike skietpraktyke: Veilige gebruik van ʼn vuurwapen bv. die loop moet altyd in ʼn veilige rigting wys.
- Verantwoordelike jagpraktyke: bv. geen afvuur van loodhael oor vleilande nie.
- Deelnemers mag slegs foto’s inskryf wat deur hulleself geneem is en waarop hulle die kopiereg het.
- Deur in te skryf, gee deelnemers aan SA Jagters toestemming om die foto’s onbeperk vir die vereniging se doeleindes te gebruik, insluitend die twee tydskrifte, maar met volle erkenning aan die fotograaf.
- Foto’s wat die beeld van jag benadeel of in ʼn slegte lig stel, bv. jagters wat met bloed besmeer is, word nie aanvaar nie
- Geen foto’s van ʼn dier wat gejag is, word aanvaar nie.
- Die bestuur behou die reg om enige foto te verwyder wat nie aan die reëls voldoen nie.
Stuur vir ons kommentaar, vrae of voorstelle
