Bestanddele

• 500g wildschnitzel of -minute steaks, sowat ‘n 5 mm dik. Sny die steak in happiegrootte stukkies, so groot soos ‘n R5-munt
• 2 eetlepels kookolie
• 3 knoffelhuisies, grof gekap
• 1 medium ui, dun skywe gesny
• 2 medium groenrissies (green peppers), skoongemaak en in happiegrootte stukkies gesny
• Paar stukkies broccoli
• Repies gesnyde wortel
• 2 sprietuie

Marinade

• 1 eetlepel sojasous
• 1 eetlepel Sjinese kookwyn (kan ook witasyn gebruik, maar die kookwyn is beter)
• ½ teelepel bakpoeier
• 3 teelepels Maizena

Roerbraaisous

• 3 eetlepels oestersous
• 3 eetlepels kookwyn
• 2 eetlepels sojasous
• ½ teelepel donker sojasous
• 2 teelepels suiker
• 1 teelepel gemaalde swartpeper
• 2 teelepels witasyn

Metode

• Stap 1
  • Roer die marinade se bestanddele goed saam, en voeg dan die vleis by. Meng die vleis goed om te verseker dat die marinade elke stukkie vleis bedek.
  • Laat rus vir 10 minute – nie langer nie!
• Stap 2
  • Roer die roerbraaisous se bestanddele saam
• Stap 3
  • Verhit die kookolie in ‘n wok totdat dit rookwarm is. Voeg die uie en knoffel by. Roerbraai vir 30 sekondes, en skuif eenkant toe in die wok.
  • Voeg die vleis by en versprei eweredig in die wok. Laat die vleis mooi seël vir 90 sekondes – MOENIE DAARAAN TORRING NIE !
  • Meng nou die vleis, uie en knoffel saam vir 60 sekondes.
  • Voeg die groenrissie, broccoli en wortel by en roerbraai vir 60 sekondes.
  • Voeg die roerbraaisous by en roerbraai vir 10 sekondes
  • Verwyder die wok van die hitte en strooi die gekerfde sprietuie oor.
  • Bedien met rys of dun noedels