Dedicated Hunters
Doel van Toegewyde Jagter Opleiding
Om die voornemende toegewyde jagter se teoretiese kennis ten opsigte van jag-en bewaringsaangeleenthede uit te brei en sy praktiese vaardighede te ontwikkel sodat hy as etiese jagter ‘n waardige ambassadeur vir die jagkuns kan wees.
Toegewyde Jagterstatus word aan lede van die SAJWV toegeken na die suksesvolle aflegging van die teoretiese Toegewyde jagterskursus van die Vereniging en ‘n praktiese skiettoets bestaande uit 3 skote vanaf 100 meter, waarvan al die drie skote in die groter hart long area van die rooibokteiken moet wees.
Hierdie is ‘n status wat aan die statutêre bepaling van Wet 60 van 2000 voldoen. Lede wat hierdie status verwerf het, kan ingevolge Artikel 16 van bogenoemde wet verklaar word as toegewyde jagter. Dit bied aan hulle die geleentheid om meer as 4 vuurwapens vir jag doeleindes te besit asook ander voordele.
Die teoretiese eksaminering van beide statusse is identies, die verskil kom in by die moeiliker skiettoets. Die Bekwame Jagter skiettoets bestaan uit nege skote, waarvan 3 uit die lêposisie op 200 meter, 3 uit die sit- of knielposisie op 100m en 3 uit die staande posisie vanaf 50 meter is.
Die Bekwame Jagter skiettoets is baie nou verwant aan die ou “CHASA” skiettoets wat die jagter in die verlede moes slaag, voordat daar statutêre bepalinge ter sprake was. Die hoër status “Bekwame Jagter” is in die lewe gebring om nie afbreek te doen aan die status van lede wat vroeër verplig was om die moeiliker skiettoets te slaag nie. Die SAJWV verkies hierdie praktiese skietvaardigheidsvlak as dié skietvaardigheid waaroor ‘n jagter moet beskik voordat daar verantwoordelik na lewendige diere in die jagveld geskiet kan word. Daarom word ‘n jagter eers bekwaam geag as hy aan hierdie spesifieke skietvaardigheidsvlak voldoen het.
 & Willem vd Westhuizen, 30-06 Sabi, 180gr Hornady, 168m.jpg)
